Specat për turshi më të shtrenjtë këtë vit, deri në 1.5 euro për kilogram
Qytetarët këtë vit do të duhet të paguajnë më shumë për blerjen e specave për turshi. Sipas tregtarëve, çmimi i kilogramit varion nga 1 euro e 30 deri në 1 euro e 50 centë, duke u rritur ndjeshëm krahasuar me vitin e kaluar kur ishte rreth 1 euro.
Shitësi Riza Krasniqi tha për Ekonomia Online se arsyeja kryesore e kësaj rritjeje janë thatësirat dhe kushtet klimatike që kanë ndikuar në prodhim. Ai shtoi se edhe pse ka interesim nga blerësit, periudha kryesore e shitjes pritet të fillojë në muajin shtator, kur edhe tradicionalisht përgatiten turshitë.
“Momentalisht çmimet variojnë prej 1 euro e 30 deri në 1 euro e 50 centë. Sivjet janë më të shtrenjtë. Interesim ka, por sezoni i turshive fillon nga shtatori. Vjet ishin 1 euro, sivjet 1 euro e 50 centë. Nuk besoj se do të ulen, sepse kushtet atmosferike kanë ndikuar”, tha Krasniqi.
