Silvinjo publikon listën, flet për miqësoren me Gjibraltarin dhe sfidën ndaj Letonisë

Trajneri i Kombëtares shqiptare, Silvinjo, ka publikuar listën e lojtarëve për dy ndeshjet e shtatorit dhe doli në konferencën zyrtare për shtyp, ku foli mbi pritshmëritë dhe zgjedhjet e tij. Kuqezinjtë do të përballen fillimisht në një miqësore me Gjibraltarin dhe më pas në një ndeshje shumë të rëndësishme kualifikuese ndaj Letonisë.

Silvinjo e cilësoi takimin testues me Gjibraltarin si një mundësi për lojtarët që nuk kanë pasur shumë minuta me Kombëtaren, ndërsa ndeshjen me Letoninë e vuri në qendër të objektivave.

“Jemi në gjysmën e rrugëtimit tonë. Ndeshja ndaj Letonisë është shumë e rëndësishme, do të përgatitemi maksimalisht. Nuk është momenti për eksperimente, kemi nevojë për lojtarë që marrin përgjegjësi dhe janë mësuar me skemat tona”, tha trajneri kuqezi.

Sa i përket lojtarëve të rinj, Silvinjo pranoi se ka pasur dilema, por shtoi se ftesat e tyre do të vijnë në kohën e duhur:
“Adrian Bajrami, Medon Berisha dhe Pajaziti kanë bërë një rrugëtim me U-21, por ende nuk kanë marrë minuta të plota me Kombëtaren A. Po i ndjekim nga afër, momenti i tyre do të vijë. Nuk kemi hapësirë për shumë ndryshime në këtë fazë.”

Trajneri foli edhe për situatën e lojtarëve kryesorë:
“Nedim Bajrami nuk është në momentin më të mirë, por ka treguar vlerat e tij me Kombëtaren. Edhe Muçi vjen pas një dëmtimi, por është i gatshëm. Te të dy kemi shumë besim.”

Për lojtarët nga Abissnet Superiore, tekniku brazilian nuk e mbylli derën:
“Klevi Qefalija është në listën e madhe, por pati një dëmtim dhe nuk u grumbullua. Dajsinani është një portier me personalitet dhe kemi lojtarë të tjerë në kampionat që po i ndjekim.”

Në fund, Silvinjo falënderoi Federatën për organizimin dhe theksoi rëndësinë e menaxhimit të dy takimeve:
“Miqësorja me Gjibraltarin do të shërbejë për testime, por gjithë fokusi ynë është tek Letonia. Kjo ndeshje është vendimtare për objektivat tona.”