Shqipërisë i duhen 20 vite për t’u klasifikuar si vend me të ardhura të larta, sipas Bankës Botërore

Shqipëria pritet të mbetet për të paktën edhe dy dekada në kategorinë e vendeve me të ardhura të mesme të larta, sipas raportit të pranverës së Bankës Botërore për vendet e Europës dhe Azisë Qendrore (ECA).

Të dhënat tregojnë se të ardhurat për frymë në Shqipëri arritën në rreth 8,500 dollarë amerikanë në vitin 2023. Megjithatë, për të kaluar në grupin e vendeve me të ardhura të larta – i cili fillon nga pragu prej 14 mijë dollarësh për frymë – do të duhen afërsisht 20 vite nëse ruhet ritmi aktual i rritjes.

Sipas Bankës Botërore, Shqipëria renditet aktualisht në kategorinë e vendeve me të ardhura të mesme të larta, ku përfshihen ekonomitë me të ardhura për frymë nga 4,500 deri në 14,000 dollarë në vit. Klasifikimi bëhet në katër nivele: të ulëta, të mesme-të ulëta, të mesme-të larta dhe të larta.

Edhe më i largët duket objektivi për të arritur standardet e jetesës që ka sot Bashkimi Europian. Projeksione të tjera nga BERZH tregojnë se Shqipërisë do t’i duhen më shumë se 50 vite për t’i kapur këto nivele.

Vendet e tjera të Ballkanit si Mali i Zi, Serbia dhe Bosnja e Hercegovina janë më afër këtij objektivi, me afate që variojnë nga 10 deri në 18 vite. Ndërkohë, Maqedonia e Veriut ka një rrugë disi më të gjatë përpara.

Nga ana tjetër, për vende si Gjeorgjia, Uzbekistani, Kirgistani dhe Armenia, kjo arritje shihet si pothuajse e paarritshme brenda një shekulli.

Raporti vë në dukje se pandemia dhe pasojat e saj ekonomike kanë shkaktuar devijime negative në pothuajse të gjitha nënrajonet e ECA-s, përveç Turqisë dhe disa pjesëve të Azisë Qendrore. Turqia është përjashtimi pozitiv, pasi ka tejkaluar pritshmëritë me një rritje prej 10% në krahasim me projeksionet e vitit 2019.

Ndër vendet që këtë vit kanë kaluar zyrtarisht në kategorinë e vendeve me të ardhura të larta janë Bullgaria, Rusia dhe Ishujt Palau. Rritja e qëndrueshme ekonomike pas pandemisë ka ndihmuar këto vende të arrijnë pragun e nevojshëm për klasifikim.

Banka Botërore rekomandon që vendet e rajonit të përqendrohen në politika të reja zhvillimore, investime në kapitalin njerëzor dhe përshpejtim të integrimit ekonomik dhe teknologjik, si rrugëdalje nga stanjacioni aktual ekonomik.