Shpërthim misterioz në Selanik: Humb jetën një grua me precedent penal
Autoritetet e Policisë Helenike po hetojnë një shpërthim misterioz që tronditi qytetin e Selanikut herët në mëngjesin e së shtunës, duke shkaktuar vdekjen tragjike të një gruaje 39-vjeçare. Ngjarja ndodhi rreth orës 05:00, jashtë një dege banke në qendër të qytetit, ku shpërthimi i fuqishëm i shkaktoi plagë të rënda gruas, përfshirë humbjen e gjymtyrëve. Ajo u dërgua me urgjencë në Spitalin “Ipokrateio”, ku fatkeqësisht ndërroi jetë pak më vonë.
Hetuesit grekë po përpiqen të zbulojnë nëse viktima ishte e përfshirë drejtpërdrejt në incident. Ndër hipotezat kryesore janë mundësia që ajo mbante pajisjen shpërthyese, që dikush tjetër ia kishte dorëzuar atë, apo që ishte një kalimtare e pafajshme që ndodhej rastësisht në vendin e gabuar në momentin e gabuar.
Sipas burimeve zyrtare, viktima kishte një dosje të pasur kriminale. Ajo ishte dënuar më parë për grabitje, prostitucion, shkelje të ligjeve për drogën dhe armët, si dhe për fajde. Në vitin 2021, ajo ishte arrestuar së bashku me një mashkull tjetër për posedim të paligjshëm të një arme automatike (kallashnikov), drogë dhe për strehimin e një personi të shpallur në kërkim.
Një nga skenarët që po shqyrtohet është se ajo mund të ketë qenë duke vendosur mjetin shpërthyes kur ndodhi aksidenti fatal, megjithatë kjo mbetet vetëm një mundësi mes të tjerave, pasi hetimet janë ende në zhvillim.
Ngjarja ka ngritur shqetësime të mëdha për sigurinë publike dhe pritet që autoritetet të publikojnë detaje të tjera sapo të përfundojnë hetimet.
