Rukiqi kërkon reagim urgjent nga Quint-i dhe BE: Rendit kushtetues në rrezik nga veprimet e Vetëvendosjes
Anëtari i Lidhjes Demokratike të Kosovës (LDK), Berat Rukiqi, ka kërkuar reagim të menjëhershëm nga Shtetet e Quint-it dhe Zyra e Bashkimit Evropian në Kosovë, për siç e quan ai, “rrezikimin e rendit kushtetues dhe demokracisë në vend”.
Sipas Rukiqit, mosrespektimi i vendimeve të Gjykatës Kushtetuese dhe uzurpimi i kabinetit qeveritar nga Lëvizja Vetëvendosje përbëjnë një kërcënim serioz për funksionimin demokratik të shtetit dhe zhvillimin institucional të Kosovës.
“Shtetet e Quint-it dhe Zyra e BE-së duhet të reagojnë qartë dhe me vendosmëri për rrezikimin e rendit kushtetues, mosrespektimin e vendimeve të Gjykatës Kushtetuese dhe uzurpimin e kabinetit qeveritar nga ish-partia në pushtet, Lëvizja Vetëvendosje,” tha Rukiqi.
Ai paralajmëroi se veprimet e deputetëve të Vetëvendosjes, që sipas tij po tentojnë të uzurpojnë institucionet dhe të sfidojnë ligjshmërinë, rrezikojnë çdo investim të bashkësisë ndërkombëtare në ndërtimin e shtetit, në proceset demokratike dhe integruese të Kosovës.
Rukiqi përfundoi duke bërë thirrje për angazhim më të madh të faktorit ndërkombëtar për të garantuar stabilitet institucional dhe funksionimin kushtetues të vendit.
