Rënie e ndjesisë ekonomike në prill, ndikohet nga industria dhe konsumatorët

Treguesi i Ndjesisë Ekonomike (TNE) pësoi rënie në muajin prill, sipas të dhënave të publikuara nga Banka e Shqipërisë. Krahasuar me muajin mars, TNE u ul me 0.8 pikë, ndonëse mbetet ende 7.4 pikë mbi mesataren afatgjatë.

Rënia u diktua kryesisht nga përkeqësimi i besimit në sektorin e industrisë dhe, në masë më të vogël, nga rënia e besimit konsumator. Ndërkohë, sektori i ndërtimit, shërbimeve dhe tregtisë regjistruan përmirësime të lehta në treguesit e tyre.

Industria në rënie të theksuar

Treguesi i besimit në industri ra me 6.7 pikë përqindje, duke thelluar vlerat negative nën mesataren historike. Ky zhvillim u ndikua nga vlerësimet pesimiste për kontratat porositëse, veçanërisht për ato të eksportit. Pavarësisht rënies, bizneset e këtij sektori presin një rritje të punësimit dhe një ulje të çmimeve në të ardhmen.

Ndërtimi vazhdon rritjen

Besimi në sektorin e ndërtimit u rrit për të dytin muaj radhazi, me 1.3 pikë përqindje. Ky tregues qëndron tashmë rreth 17 pikë përqindje mbi mesataren afatgjatë, i mbështetur nga rritja e vlerësimeve për porositë aktuale. Pritjet për punësimin dhe çmimet janë gjithashtu në rritje.

Shërbimet dhe tregtia me rritje të lehtë

Në sektorin e shërbimeve, treguesi i besimit u rrit me 0.5 pikë përqindje, duke qëndruar rreth 14 pikë mbi mesataren historike. Rritja u nxit nga përmirësimi i aktivitetit aktual dhe kërkesës. Edhe në këtë sektor, bizneset presin përmirësim në punësim dhe çmime.

Tregtia gjithashtu shënoi rritje me 0.8 pikë përqindje, falë pritjeve optimiste për punësimin. Niveli aktual i treguesit është rreth 7 pikë përqindje mbi mesataren historike, ndërsa pritjet për çmime dhe ecurinë e biznesit janë përmirësuar.

Rënie e besimit konsumator

Treguesi i besimit konsumator ra me 1.3 pikë përqindje në prill, edhe pse qëndron ende mbi mesataren historike me 2 pikë. Rënia u ndikuar nga përkeqësimi i pritjeve për situatën ekonomike dhe financiare, si dhe nga vlerësimet për blerjet aktuale në shuma të mëdha. Pritjet për punësimin dhe çmimet në të ardhmen janë gjithashtu lehtësisht më pesimiste.