Qeveria në detyrë e Kosovës pritet të mblidhet sot në ora 11:00, në një situatë të zgjatur bllokimi institucional që po vazhdon prej më shumë se gjashtë muajsh pas zgjedhjeve parlamentare të 9 shkurtit.
Kosova ende mbetet pa një Kuvend të konstituuar dhe pa një qeveri të re, ndërsa afati i caktuar nga Gjykata Kushtetuese më 26 qershor për konstituimin e Kuvendit tashmë ka skaduar. Sipas vendimit të kësaj gjykate më 24 korrik, deputetët nuk mund të ndërmarrin asnjë veprim për konstituimin e Kuvendit deri më 8 gusht.
Në këtë klimë paqartësie dhe tensioni politik, Kryeministri në detyrë, Albin Kurti, ka vazhduar me gjuhë të ashpër ndaj kundërshtarëve të tij politikë. Gjatë një deklarate dje, ai tha se kundërshtimet e opozitës nuk kanë të bëjnë me ministren Albulena Haxhiu, por me Vetëvendosjen dhe me vullnetin e popullit.
“Opozita nuk ka problem me Albulenën, por me popullin që nuk ua dha besimin dhe me VETËVENDOSJE!-n që ua ndali përfitimet e paligjshme,” deklaroi Kurti, duke shtuar me një gjuhë përçmuese: “…siç thotë populli ynë, këta as nuk po shtyhen, as nuk po ngrihen.”
Në ditët në vijim pritet që Gjykata Kushtetuese të sqarojë pasojat juridike për deputetët e zgjedhur dhe të japë drejtim për hapat që duhet të ndërmerren në vazhdim. Ndërkohë, vendi mbetet në pritje të zgjidhjes së ngërçit institucional.
