Plazhi i Durrësit, një nga destinacionet më të frekuentuara gjatë sezonit turistik në Shqipëri, po përballet me një problem të përsëritur, prania në rritje e qenve endacakë. Në disa zona të vijës bregdetare, qentë janë parë duke lëvizur në grup, shpesh mes pushuesve, duke shkaktuar frikë, shqetësim dhe pasiguri.
Sipas raportimeve nga qytetarët dhe pushuesit, qentë nuk janë gjithmonë agresivë, por prania e tyre në ambiente publike, sidomos aty ku ka fëmijë, ngjall ankth. Disa prej kafshëve janë në dukje të uritura dhe pa kujdes veterinar, çka shton rrezikun për përhapjen e sëmundjeve ose incidente të mundshme.
Autoritetet vendore deri më tani nuk kanë marrë masa të dukshme për të menaxhuar situatën. Aktivistët për të drejtat e kafshëve theksojnë se problemi nuk mund të zgjidhet me dhunë ndaj qenve, por kërkojnë ndërhyrje institucionale për sterilizim, strehim dhe kujdes veterinar.
Ndërkohë, pushuesit dhe banorët lokalë shpresojnë në një zgjidhje të shpejtë për të siguruar një sezon turistik të qetë dhe të sigurt për të gjithë/ Bekim D. Olluri – Blici.al
