Prokuroria Speciale e Republikës së Kosovës ka njoftuar se i ka dërguar kërkesë zyrtare autoriteteve kroate për sigurimin e provave lidhur me arrestimin e shtetases së Kosovës, Ana Murganiq, dhe partnerit të saj, pilot në Ushtrinë Kroate dhe ish-pjesëtar i KFOR-it në Kosovë, të cilët po hetohen për spiunazh.
Nga Prokuroria Speciale kanë bërë të ditur për RTK se janë në kontakt të vazhdueshëm me autoritetet përkatëse dhe do të ndërmarrin veprimet ligjore të nevojshme në përputhje me marrëveshjet për bashkëpunim juridik ndërkombëtar.
Çifti u arrestua në Kroaci dhe ndaj tyre është caktuar masa e paraburgimit prej 30 ditësh. Ata dyshohen se kanë transmetuar informacione konfidenciale për KFOR-in dhe zhvillimet në veri të Kosovës te Lista Serbe, ndërsa sipas mediave kroate, Murganiq dyshohet të ketë pasur lidhje edhe me shërbimet sekrete serbe.
Gazeta kroate Večernji list raportoi se nga hetimi i telefonit celular janë zbuluar mesazhe ku përveç të dhënave për lëvizjet e KFOR-it, ishin përcjellë edhe informacione te një gazetar ndërkombëtar.
Avokatja e të dyshuarës, Doris Koshta, tha se klientët e saj e mohojnë akuzën dhe kanë paraqitur ankesë kundër vendimit për paraburgim.
Ndërkohë, Zyra e Presidentit të Kroacisë bëri të ditur se presidenti Zoran Milanoviq është informuar për rastin dhe ka shprehur mbështetje për institucionet që po hetojnë.
Gjykata e Qarkut në Split theksoi se hetimi mbetet sekret, ndërsa dënimet për spiunazh në Kroaci variojnë nga një deri në dhjetë vjet burg.
