Princi Al-Waleed bin Khaled, i njohur si “Princi i Fjetur”, mbush 36 vjeç

Princi Al-Waleed bin Khaled bin Talal, i njohur në botën arabe si “Princi i Fjetur,” mbushi 36 vjeç më 18 prill. Ai ka qëndruar në gjendje kome për më shumë se dy dekada, që nga viti 2005, kur u plagos rëndë në një aksident automobilistik në Londër.

Në rastin e ditëlindjes së tij, rrjetet sociale u mbushën me urime dhe mesazhe shprese për princin, i cili është shndërruar në një simbol të besimit të palëkundur për miliona njerëz. Nëna e tij, Princesha Reema bin Talal, ndau foto nga fëmijëria e djalit të saj, si dhe momente të fundit nga jeta e tij, duke shkruar: “I dashuri im Al-Waleed bin Khaled, 21 vjet pas (aksidentit), ti mbetesh i pranishëm në zemrat tona dhe në lutjet e të gjithë atyre që të duan. Zoti im, shëroje robin tënd të dobët.”

Lëvizjet e fundit të princit janë regjistruar në vitin 2019, kur thuhet se ai dha disa përgjigje të vogla, si ngritja e gishtit ose lëvizja e kokës. Megjithatë, ai nuk ka dalë kurrë nga koma. Familja e tij vazhdon të shpresojë për një mrekulli. Babai i tij, Princi Khaled bin Talal, dhe nëna e tij, Princesha Reema, besojnë se fuqia e Lartë mund ta shërojë një ditë.

Në një intervistë të mëparshme, Princesha Reema kishte deklaruar se “shpirti i djalit të saj është ende i pranishëm,” ndërsa Princi Khaled kishte refuzuar kategorikisht të ndalonte mbajtjen e tij në pajisjet mjekësore.