Patrice Evra rikthehet në sport, sfidon Luis Suarezin në MMA
Ish-mbrojtësi legjendar i Manchester United, Patrice Evra, ka befasuar të gjithë me rikthimin e tij në botën e sportit, këtë herë jo në futboll, por në arenën e mundjes dhe arteve marciale të përziera (MMA). Shtatë vite pas tërheqjes nga futbolli profesionist, Evra ka konfirmuar përmes një postimi në platformën X (ish-Twitter) se po stërvitet për debutimin e tij në këtë disiplinë.
Ajo që tërhoqi më shumë vëmendje ishte emri i kundërshtarit që francezi dëshiron të ketë përballë: Luis Suarez. “Më pyetën se kë dua si kundërshtar. I thashë: Luis Suarez. Do ta paguaj nga xhepi im. Ai mund të më kafshojë përsëri”, shkroi Evra me ironi, duke rikujtuar përplasjet e së kaluarës mes tyre.
Rivaliteti i tyre daton që nga nëntori i vitit 2011, kur Suarez, atëherë pjesë e Liverpool-it, u dënua me tetë ndeshje për abuzim racor ndaj Evras. Marrëdhëniet mes tyre u përkeqësuan edhe më tej, kur uruguaiani refuzoi t’i jepte dorën Evras gjatë një takimi mes Manchester United dhe Liverpool-it.
Ndërkohë, Suarez ende nuk ka reaguar ndaj sfidës, por fansat e MMA-së dhe të futbollit janë të entuziazmuar për mundësinë e një dueli të tillë mes dy ish-rivalëve të zjarrtë.
