Mziu denoncon përpjekje për blerje votash në Dibër: Thirrje për veprim urgjent nga SPAK

Drejtuesi politik i Partisë Demokratike për qarkun e Dibrës, Xhelal Mziu, ka ngritur alarmin për përpjekje të vazhdueshme për deformimin e vullnetit të qytetarëve nëpërmjet blerjes së votës në këtë qark. Në një postim të publikuar në rrjetin social Facebook, Mziu akuzon eksponentë të Partisë Socialiste dhe punonjës të administratës lokale se janë përfshirë në skema presioni dhe manipulimi elektoral.

“Ne nuk do të lejojmë që demokracia të nëpërkëmbet – kushdo që do tentojë të prekë votën e lirë do të na ketë përballë,” deklaron Mziu, duke i bërë thirrje publike SPAK-ut dhe institucioneve të drejtësisë të nisin hetime të menjëhershme dhe të marrin masa kundër individëve të përfshirë në këto veprime të paligjshme.

Ai ka publikuar një listë të gjatë me emra të personave që, sipas tij, janë të përfshirë në aktivitete të tilla, përfshirë administratorë njësish administrative, drejtorë institucionesh, punonjës të ndihmës ekonomike, elektricistë, shpërndarës të pensioneve dhe eksponentë lokalë të Partisë Socialiste.

Sipas Mziut, informacionet janë konfirmuar edhe nga vetë persona brenda PS-së, duke shtuar se ditët në vijim do të publikohen të tjera prova me zë dhe figurë. Ai paralajmëroi se opozita është e vendosur të mos lejojë që historia e manipulimit të zgjedhjeve të përsëritet.

Ky denoncim vjen në një moment kritik, në përfundim të procesit zgjedhor, kur tensionet politike janë të larta dhe akuzat për parregullsi janë shtuar ndjeshëm nga kampi opozitar.