Mot i paqëndrueshëm këtë fundjavë, të hënën rikthehet dielli
Instituti Hidrometeorologjik ka paralajmëruar ndryshime të theksuara të motit gjatë fundjavës.
Të shtunën, vranësirat do të shtohen që nga mëngjesi, ndërsa në mesditë priten rrebeshe shiu në pjesën perëndimore të vendit. Pas mbrëmjes, reshjet do të përfshijnë edhe pjesë tjera të Kosovës, duke u shoqëruar herë pas here me bubullima. Era do të fryjë mesatare nga jugperëndimi dhe perëndimi me shpejtësi 4-12 m/s, ndërsa në hove pritet të kalojë mbi 15 m/s. Temperaturat maksimale do të arrijnë deri në 30°C – 31°C, por me kalimin e frontit të ftohtë pasdite zbresin nën 20°C.
E diela sjell më shumë intervale me diell, por temperaturat mbeten më të ulëta, rreth 24°C – 25°C. Aty-këtu, pritet të ketë ndonjë rrebesh shiu në orët e pasdites.
Nga dita e hënë, moti stabilizohet dhe mbizotëron dielli. Temperaturat do të rriten gradualisht, duke arritur mbi 30°C të martën. Të mërkurën, me afrimin e një shtjelle ciklonike në rajon, parashihen përsëri rrebeshe shiu, ndërsa temperaturat zbresin lehtë në 28°C.
Minimalet gjatë këtyre ditëve do të luhaten mes 12°C dhe 14°C, ndërsa erërat do të jenë kryesisht nga perëndimi dhe jugu, me intensitet të lehtë deri mesatar 3-10 m/s.
Sipas meteorologëve, fundjava kërkon kujdes për shkak të ndryshimeve të shpejta të temperaturës dhe rrebesheve të mundshme, por nga e hëna pritet një përmirësim i dukshëm i motit.
