Mot i nxehtë e me diell të premten, reshje shiu dhe freskim në fundjavë

Të premten vendi do të mbretërohet nga mot stabil, me kthjellime dhe diell. Temperaturat minimale do të zbresin deri në 10°C – 14°C, ndërsa maksimalet do të arrijnë kulmin e kësaj periudhe të të nxehtit, me vlera prej 34°C deri në 36°C. Era do të fryjë e lehtë dhe mesatare nga jugu e jugperëndimi, me shpejtësi 4-9 m/s.

Ndryshim i kushteve atmosferike pritet nga e shtuna. Vranësirat do të shtohen gjatë ditës, ndërsa në mbrëmje priten rrebeshe shiu dhe bubullima. Reshjet kohëpaskohe do të vazhdojnë edhe të dielën, duke sjellë rënie të ndjeshme temperaturash deri në 23°C – 24°C.

Nga e hëna, moti parashihet sërish stabil, me temperatura që do të marrin trend rritës, duke u ngjitur në 28°C – 31°C. Minimalet do të sillen nga 12°C deri në 15°C. Erërat do të jenë kryesisht nga jugu dhe perëndimi me shpejtësi 5-10 m/s, por herë pas here mund të ndryshojnë drejtim në veriore për shkak të kalimit të sistemeve frontale.

Mendimi për Motin njofton se fundjava do të shënojë fundin e verës meteorologjike me reshje e freskim, ndërsa java e re sjell rikthim të kushteve të qëndrueshme.