Më pak se dy orë nga nisja e tubimit, sheshi “Skënderbej” në Tiranë ‘vishet’ kuq e zi

Tanimë kanë arritur protestuesit e parë në sheshin “Skënderbej”, në Tiranë, aty ku në orën 17:00, është paralajmëruar të nis protesta “Drejtësi për çlirimtarët”.

Aty kanë nisur edhe përgatitjet nga ku do të mbahen fjalimet për protestën në mbështetje të ish-krerëve të Ushtrisë Çlirimtare të Kosovës.

Sheshi ka filluar nga tani të mbushet me qytetarë nga Kosova të cilët po mbajnë në duar flamujtë kuq e zi dhe simbole të UÇK-së.

Mësohet se gjatë protestës, fjalimet do të mbahen nga kryetari i OVL-UÇK-së, Hysni Gucati, ish-presidenti i Shqipërisë, Alfred Moisiu, ish-udhëheqësi i UÇK-së, Ali Ahmeti dhe një përfaqësues i familjeve të dëshmorëve.

Protesta në Tiranë organizohet nga Organizata e Veteranëve të Luftës së Ushtrisë Çlirimtare të Kosovës (OVL-UÇK). Gjatë ditës së djeshme në konferencë për media kanë njoftuar se nga Kosova do të nisen mbi 60 autobusë. /euronewsal