“Mallkimi i Met Gala-s”: A do t’i rezistojnë çiftet e famshme këtij oguri të modës?
Met Gala-ja e këtij viti, që zhvillohet më 6 maj (mbrëmja e 5 majit në SHBA), po afron me shpejtësi dhe sytë e gjithë botës janë drejt tapetit të kuq më të famshëm të modës. Pjesëmarrësit, nga ikonat e stilit tek figurat më të njohura të kinemasë, muzikës dhe artit, janë gati të shkëlqejnë me veshjet e tyre ekstravagante — por edhe të na japin një tjetër spektakël: debutimet e çifteve të famshme.
Spekulimet janë të shumta se Kylie Jenner dhe Timothée Chalamet mund të shfaqen për herë të parë si çift në Met Gala. Por një pyetje e pazakontë ka filluar të qarkullojë gjithnjë e më shumë në rrjet: A do t’i rezistojnë ata mallkimit të Met Gala-s?
Çfarë është “mallkimi i Met Gala-s”?
Sipas fansave dhe mediave rozë, “mallkimi” është një fenomen që lidhet me ndarjet e çifteve të famshme menjëherë pas pjesëmarrjes në Met Gala. Qoftë përmes daljes së tyre të parë si çift, apo edhe thjesht si pjesë e eventit, shumë marrëdhënie kanë marrë fund pak kohë më pas.
Në disa raste, Met Gala ka qenë edhe vendi ku kanë nisur romanca të reja – si ajo e Taylor Swift dhe Tom Hiddleston – por që gjithashtu përfunduan shumë shpejt. Me kalimin e viteve, shembujt janë shtuar aq shumë, sa fansat kanë nisur ta quajnë këtë fenomen si një ogur të keq për jetën romantike të VIP-ave.
Disa nga çiftet që nuk i shpëtuan “mallkimit”:
Kirsten Dunst dhe Jake Gyllenhaal (Met Gala 2003) – u ndanë në 2004
FKA Twigs dhe Robert Pattinson (2015) – u ndanë në 2017
Selena Gomez dhe The Weeknd (2017) – u ndanë po atë vit
Jennifer Lopez dhe Alex Rodriguez (2017) – ndarja në 2021
Kylie Jenner dhe Travis Scott (2018) – ndarja përfundimtare në 2023
Hailey Bieber dhe Shawn Mendes (2018) – ndarë pas një viti
Grimes dhe Elon Musk (2018) – ndarë në 2021
Shawn Mendes dhe Camila Cabello (2021) – ndarë po në 2021
Kim Kardashian dhe Pete Davidson (2022) – ndarë pas 9 muajsh
Lista është e gjatë, dhe modelet e ndarjeve janë shpesh të njëjta: një paraqitje madhështore e ndjekur nga distanca, polemika dhe në fund, ndarje.
Një ogur i vërtetë apo thjesht rastësi?
Natyrisht, nuk ka prova shkencore që Met Gala ndikon drejtpërdrejt në ndarjet e VIP-ave, por presioni publik, analizat e pafundme në media dhe ekspozimi ekstrem mund të jenë faktorë që testojnë çdo marrëdhënie.
Nëse është thjesht një koincidencë apo një “mallkim” i vërtetë, mbetet për t’u parë. Por një gjë është e sigurt: këtë vit, të gjithë do të kemi sytë te tapeti i kuq — jo vetëm për modën, por edhe për çiftet që guxojnë të përballen me “mallkimin”.
