KRU “Prishtina” uron fillimin e vitit shkollor dhe nis program edukativ për nxënësit
Kompania Rajonale e Ujësjellësit “Prishtina” i ka uruar të gjithë nxënësit dhe mësimdhënësit e Kosovës për një fillim të mbarë të vitit të ri shkollor, që nis më 1 shtator.
“Urojmë një fillim sa më të mbarë për të gjithë nxënësit dhe mësimdhënësit. Duar të arta dhe mendje të shëndosha për fëmijët tanë”, thuhet në urimin e kompanisë.
Përveç urimit, KRU “Prishtina” ka njoftuar se me nisjen e vitit shkollor do të fillojnë edhe ligjëratat në të gjitha shkollat fillore dhe të mesme të ulëta. Qëllimi i këtyre ligjëratave është të ndërgjegjësohen nxënësit për rëndësinë dhe vlerën e ujit, kursimin e tij, si dhe njohjen me proceset teknologjike të trajtimit të ujit.
Zëdhënësja e KRU “Prishtina”, Arjeta Mjeku, tha se ky program është pjesë e angazhimit afatgjatë të kompanisë për edukimin e gjeneratave të reja rreth menaxhimit të qëndrueshëm të ujit. “Edukimi për ujin është investim në të ardhmen. Nxënësit janë bartësit kryesorë të mesazheve të kursimit dhe mbrojtjes së burimeve ujore”, shtoi ajo.
Programi pritet të përfshijë të gjitha shkollat e komunës, duke synuar që çdo nxënës të ketë njohuri bazë mbi rëndësinë e ujit dhe mënyrat për ta kursyer atë.
