KQZ nesër vendos për decertifikimin e kandidatëve dhe përgatitjet për zgjedhjet lokale të 12 tetorit
Komisioni Qendror i Zgjedhjeve (KQZ) do të vazhdojë me mbajtjen e mbledhjeve, ku fokusi kryesor mbetet përgatitja e zgjedhjeve lokale që do të zhvillohen më 12 tetor 2025.
Në mbledhjen e 52-të, e cila do të udhëhiqet nga kryesuesi Kreshnik Radoniqi, në rend dite është shqyrtimi dhe vendimmarrja për disa rekomandime që lidhen me decertifikimin dhe certifikimin e kandidatëve nga partitë politike: Vetëvendosje, Lidhja Demokratike e Kosovës (LDK), Guxo, Alternativa, Bashkimi Demokratik, Kosovski Savez dhe Koalicioni Vakat.
Përveç çështjeve të listës zgjedhore, KQZ pritet të diskutojë edhe për pjesëmarrjen e këtij institucioni në dy ngjarje ndërkombëtare. Njëra prej tyre është punëtoria rajonale e ODIHR në Varshavë më 16–17 shtator, me temë “Ruajtja e Integritetit Zgjedhor në Ballkanin Perëndimor”. Ngjarja tjetër është programi i vëzhgimit të zgjedhjeve lokale në Estoni, që do të mbahet nga 17 deri më 20 tetor, vetëm pesë ditë pas zgjedhjeve në Kosovë.
Mbledhja e KQZ-së pritet të mbajë peshë të veçantë, pasi do të përcaktojë jo vetëm listën përfundimtare të kandidatëve në garën e tetorit, por edhe angazhimet ndërkombëtare të institucionit për forcimin e integritetit zgjedhor.
