Kosova shënon Ditën Ndërkombëtare të Personave të Zhdukur: Ende 1,577 të pagjetur nga lufta

Të shtunën, më 30 gusht, shënohet Dita Ndërkombëtare e Personave të Zhdukur, ndërsa familjarët e afër 1,577 personave nga lufta e fundit në Kosovë vazhdojnë të presin përgjigje për fatin e tyre.

Kanë kaluar mbi 26 vjet nga përfundimi i luftës, por dhimbja dhe pasiguria e familjarëve mbetet e njëjtë. Në muajin mars të këtij viti u kryen 11 identifikime, sipas Komisionit Qeveritar për të Pagjeturit, duke e ulur disi numrin e përgjithshëm të të zhdukurve.

Aktivitete të ndryshme do të zhvillohen në Kosovë të premten dhe të shtunën për nder të kësaj dite. Sot, kryeministri në detyrë, Albin Kurti, do të bëjë homazhe pranë Monumentit të Personave të Zhdukur në Prishtinë, në orën 10:45.

Kujtojmë se në dhjetor të vitit 2024, Kosova dhe Serbia u pajtuan për zbatim të plotë të Deklaratës për Personat e Pagjetur, marrëveshje që pritet të ndihmojë në zbardhjen e fatit të shumë të zhdukurve.