Kosova përkujton Ditën Ndërkombëtare të Personave të Zhdukur: Rreth 1,600 ende figurojnë të pagjetur

Sot, më 30 gusht, shënohet Dita Ndërkombëtare e Personave të Zhdukur, ndërsa kanë kaluar mbi 26 vjet nga përfundimi i luftës në Kosovë dhe ende rreth 1,600 persona vazhdojnë të figurojnë si të pagjetur.

Në këtë ditë, Fondi për të Drejtën Humanitare Kosovë do të inaugurojë memorialin “Pema e jetëve”, në orën 20:00, në platonë mbi parkingun nëntokësor të Sheshit “Xhorxh Bush” në Prishtinë. Po ashtu, Nisma e të Rinjve për të Drejtat e Njeriut (YIHR KS) do të organizojë një aksion simbolik, ku do të lexohen dhe dëgjohen emrat e personave të zhdukur gjatë luftës së fundit në Kosovë.

Një ditë më parë, krerët e institucioneve të vendit, presidentja Vjosa Osmani, kryeministri në detyrë Albin Kurti dhe kryetari i Kuvendit Dimal Basha, bënë homazhe pranë Monumentit të Personave të Zhdukur në Prishtinë.

Presidentja Osmani deklaroi se zhdukja me dhunë e personave të pafajshëm mbetet një krim i vazhdueshëm i Serbisë, duke shtuar se ajo shkel çdo ditë Konventën Ndërkombëtare për të Drejtat e Njeriut.
“Përtej krimeve të kryera në vitet 1998-1999, Serbia edhe sot mban të dashurit tanë në varreza masive dhe nuk zbaton marrëveshjet e arritura në Bruksel për zbardhjen e fatit të tyre,” tha ajo.

Ndërkaq, kryeministri në detyrë Kurti theksoi se institucionet e Kosovës po punojnë me përkushtim për zbardhjen e këtij procesi.
“Vetëm gjatë vitit të fundit janë gjurmuar mbi 23 lokacione, ndërsa këtë vit janë zhvilluar 18 aktivitete kërkimore për zbulimin e mbetjeve mortore të të dashurve tanë,” u shpreh ai.

Kryeparlamentari Dimal Basha kërkoi nga Serbia që të tregojë urgjentisht vendndodhjen e personave të zhdukur dhe masakrave të kryera, duke e cilësuar këtë një obligim moral dhe ndërkombëtar.

Edhe pas më shumë se dy dekadash nga përfundimi i luftës, fati i mbi 1,600 qytetarëve të Kosovës mbetet ende i panjohur.