Ka nisur publikimi i rezultateve të votave me postë: LDK kryeson në Dragash, Vetëvendosje në Shtime
Komisioni Qendror i Zgjedhjeve (KQZ) ka njoftuar se në Qendrën e Numërimit dhe Rezultateve ka filluar procesi i numërimit të votave që i takojnë votimit jashtë Kosovës, të realizuara përmes postës nga 17 shtatori deri më 11 tetor 2025.
Gjatë ditës së sotme, KQZ ka nisur publikimin e rezultateve të para të këtyre votave në disa komuna të vendit.
Në komunën e Dragashit, janë numëruar 88.89% e votave me postë. Sipas rezultateve paraprake, kandidati i LDK-së, Behxhet Xheladini, kryeson me 54.08% të votave, apo 1,014 vota. Pas tij renditet kandidati i PDK-së, Shaban Shabani, me 26.83% (503 vota), ndërsa në vendin e tretë është Filiz Mustafa nga Vetëvendosje, me 17.44% (327 vota).
Ndërkohë, në komunën e Shtimës, situata është e kundërt. Aty Vetëvendosje kryeson me shumicën e votave me postë. Kandidati i saj, Qemajl Aliu, ka siguruar 50.20% të votave, apo 251 vota, nga 75% e votave të numëruara deri më tani. Pas tij vjen kandidati i PDK-së, Përparim Ramusa, me 34.40% (172 vota).
Ndërkohë, për kryeqytetin, KQZ ende nuk ka nisur publikimin e rezultateve të votave me postë.
Procesi i numërimit pritet të vazhdojë gjatë ditëve në vijim, ndërsa rezultatet përfundimtare të votave jashtë vendit do të publikohen pas përfundimit të numërimit në të gjitha komunat.
