Irena Beqiraj publikon video ironike kundër manipulimeve elektorale: “Tan’ dekunit i kena n’lista!”

Ish-zëvendësministrja e Financave, Irena Beqiraj, ka ndezur debatet në rrjetet sociale pas publikimit të një videoje ironike në Facebook, ku shënjestron praktikat manipulative të patronazhistëve të Partisë Socialiste në prag të zgjedhjeve të 11 majit.

Në videon e publikuar, një djalë i vogël dhe gjyshi i tij – i cili pretendon se është i sëmurë dhe ndodhet në spital – shprehin dëshirën që i moshuari të mbijetojë deri më 11 maj, për të mundur të votojë. Kjo skenë, në pamje të parë e ngarkuar emocionalisht, shfaq në thelb një ironi therëse ndaj mënyrës se si, sipas Beqirajt, përdoren ndjenjat dhe vuajtjet e qytetarëve për të ushtruar presion dhe për të siguruar vota për partinë në pushtet.

Komentin që shoqëron videon, Beqiraj e formulon me një ton të hapur sarkastik:
“Axh, ti paç veç jetë, e për votë hiç mos ved! Se ne jena specialista, tan’ dekunit i kena n’lista!”
Përmes këtij teksti, ajo aludon për futjen në listat e votuesve edhe të qytetarëve që ndodhen në kushte ekstreme, madje edhe atyre që nuk janë më gjallë, si pjesë e një strategjie për të kontrolluar rezultatin zgjedhor.

Në përmbyllje të postimit, Beqiraj ka ndarë edhe një thënie të njohur:
“Mendja është si parashuta, funksionon nëse hapet!”, duke u bërë thirrje qytetarëve të reflektojnë dhe të mos bien pre e manipulimeve politike.

Postimi i saj ka nxitur një valë reagimesh dhe diskutimesh në rrjetet sociale, ku shumë përdorues shprehen të shqetësuar për nivelin e ndërhyrjes politike dhe përdorimin e emocioneve si mjet për të fituar vota. Ky moment është tashmë pjesë e debatit më të gjerë mbi transparencën dhe integritetin e fushatave zgjedhore në Shqipëri.