Interi rikthen sytë nga Koni De Winter, në pritje të largimeve të Pavard ose Bisseck

Sky Sport Italia raporton se Interi është rikthyer në bisedime intensive me Genoa-n për transferimin e mbrojtësit të talentuar 23-vjeçar, Koni De Winter. Klubi zikaltër po e mban De Winter në plan të parë si opsion emergjent, në rast se largohet Benjamin Pavard ose Yann Bisseck, dy mbrojtës të cilët kanë tërhequr interes serioz nga Premier League.

Interesi për De Winter daton që nga maji i këtij viti, kur u bë një tentativë e parë për transferim, por më pas skuadra e drejtuar nga Cristian Chivu vendosi të fokusonte përforcimet në zona të tjera. Tani, me rikthimin e ofertave nga Premier League për Bisseck dhe një skenar të mundshëm largimi të Pavard, drejtuesit e Interit janë rikthyer në pistën e Genoa-s.

Bisedimet e reja mes klubeve u zhvilluan këtë të premte, ndërsa De Winter është paralajmëruar të jetë në gatishmëri për çdo zhvillim të mundshëm. Interi shpreson që mbrojtësi të qëndrojë në pritje, duke lënë pezull ofertat e Bournemouth-it për të.

Në konkurrencë për një rol të ngjashëm mbetet edhe Giovanni Leoni i Parma-s, i cili pëlqehet nga Milani dhe Liverpool, por De Winter ka avantazhin e përvojës më të madhe në moshën 23-vjeçare dhe mund të kushtojë më pak se 40 milionë eurot që kërkohen për Leoni-n.

Interi duket se po zgjedh të rrisë fleksibilitetin në mbrojtje, duke mbajtur opsione të gatshme në rast të lëvizjeve në merkaton e verës. Gjithçka do të bëhet e qartë në ditët në vijim, ndërsa bisedimet me Genoa-n vazhdojnë.