Gjykata Supreme shqyrton padinë e OEK kundër ZRrE për tregun e lirë të energjisë

Gjykata Supreme e Kosovës ka vendosur që të trajtojë padinë e ushtruar nga Oda Ekonomike e Kosovës (OEK) ndaj Zyrës së Rregullatorit për Energji (ZRrE), lidhur me daljen e detyrueshme në tregun e lirë të energjisë.

Në një njoftim për media, OEK bëri të ditur se tashmë është caktuar kolegji i gjyqtarëve që do ta shqyrtojë lëndën dhe se vendimi pritet të merret brenda afatit ligjor prej 60 ditësh.

“Pritjet tona janë që gjykata të anulojë të gjitha aktet nënligjore të ZRrE-së me të cilat janë përcaktuar kriteret për daljen në tregun e lirë”, thuhet në reagimin e Odës.

Edhe pse kërkesa për vendosjen e masës së përkohshme për pezullimin e vendimit nuk është aprovuar, OEK thekson se çështja do të shqyrtohet në themel për të gjitha aktet nënligjore, përveç “Njoftimit të ZRrE-së”, i cili sipas gjykatës nuk përbën akt normativ.

“Oda Ekonomike e Kosovës vlerëson pozitivisht faktin se lënda do të trajtohet në themel dhe shpreh besimin se vendimi final do të jetë në të mirë të ekonomisë, bizneseve dhe qytetarëve të Kosovës”, përfundon njoftimi.