Gjykata Komerciale pezullon vendimin e ZRrE-së për 5 kompani të tjera – Oda Ekonomike kërkon anulim të vendimit për tregun e lirë të energjisë
Gjykata Komerciale e Kosovës ka pezulluar vendimin e Zyrës së Rregullatorit për Energji (ZRrE) që parashihte kalimin e detyrueshëm në tregun e lirë të energjisë për pesë kompani të tjera. Lajmin e ka bërë të ditur Oda Ekonomike e Kosovës (OEK), përmes një njoftimi zyrtar.
Sipas OEK-ut, këto kompani kishin ushtruar padi individuale kundër vendimit të ZRrE-së dhe kanë arritur të fitojnë të drejtën e tyre ligjore përmes këtij mekanizmi gjyqësor. Oda rikujton se legjislacioni aktual nuk e njeh formatin e padive grupore, andaj vetëm ato individuale po trajtohen dhe po pranohen nga gjykata.
Duke reaguar pas këtij vendimi të ri të gjykatës, Oda Ekonomike ka ripërsëritur thirrjen drejtuar ZRrE-së që të anulojë vendimin për kalimin e detyrueshëm në tregun e lirë të energjisë. Sipas saj, një vendim i tillë rrezikon të dëmtojë konkurrencën e ndershme, bizneset, qytetarët dhe në përgjithësi ekonominë e vendit.
“ZRrE-ja duhet të tërheqë vendimin e saj, në mënyrë që të shmanget dëmtimi i mëtejmë i sektorit privat dhe i konsumatorëve,” thuhet ndër të tjera në reagimin e OEK-ut.
Ky është aktvendimi i radhës që pezullon zbatimin e këtij vendimi të kontestuar, pas një sërë padish të ngjashme që janë ushtruar nga biznese të ndryshme gjatë muajve të fundit.
