Fanse nga SHBA padit Meghan Markle dhe Netflix për dëmtim të shëndetit nga receta e kripës së banjës në serialin “With Love, Meghan”
Një fanse nga Maryland, Robin Patrick, ka ngritur pretendime të rënda ndaj Meghan Markle dhe Netflix, duke i akuzuar për shkaktimin e dëmeve të mëdha shëndetësore përmes një recete të kripës së banjës që u shfaq në serialin “With Love, Meghan”. Ajo ka deklaruar se pas përdorimit të një përzierje me kripëra Epsom dhe Himalaje, vaj arnika dhe vaj livandoje, ka pësuar djegie, plagë të hapura dhe dhimbje të forta. Kjo ndodhi pasi Meghan, në episodin e parë të serialit, përgatiti këtë përzierje si një dhuratë relaksuese për një mik.
Patrick tani kërcënon me një padi prej 10 milionë dollarësh ndaj Dukeshës së Sussex-it, Netflix dhe kompanisë së produksionit “Archewell”. Sipas saj, receta u shpërnda pa paralajmërimin e nevojshëm për efektet anësore të mundshme, duke e konsideruar këtë veprim si “neglizhencë të rrezikshme”.
Përgjigjja nga avokati i Meghan Markle, Cameron Stracher, ka qenë e qartë: ai ka hedhur poshtë akuzat duke theksuar se përdorimi i këtyre përbërësve kërkon kujdes të veçantë për individët me sëmundje kronike, dhe se kjo është e shënuar qartë në etiketat e produkteve të përdorura.
Ky incident ka hapur një debat të gjerë në rrjet mbi ndikimin që kanë personazhet publikë dhe përgjegjësinë e tyre ndaj ndjekësve kur ndajnë receta apo këshilla që lidhen me shëndetin.
