Elon Musk “shpërthen” ndaj Microsoft: “OpenAI do ta përpijë për së gjalli”
Miliarderi Elon Musk ka lëshuar një deklaratë të fortë ndaj gjigantit teknologjik Microsoft, duke parashikuar një dominim absolut të OpenAI në industrinë globale të inteligjencës artificiale.
Në një koment të drejtpërdrejtë ndaj CEO-së së Microsoft-it, Satya Nadella, Musk theksoi: “OpenAI do ta përpijë për së gjalli Microsoft-in”. Kjo deklaratë vjen në një kohë tensionesh të thella mes Muskut dhe OpenAI – kompanisë që ai ndihmoi të themelohej, por më pas e paditi për, sipas tij, devijimin nga misioni fillestar jofitimprurës.
Microsoft ka investuar më shumë se 10 miliardë dollarë në OpenAI, duke integruar teknologjitë e saj më të avancuara të AI në produktet kryesore si Office dhe platforma cloud Azure. Megjithatë, Musk e sheh këtë aleancë si një rrezik serioz për vetë Microsoft-in, duke nënkuptuar se kompania po humbet kontrollin ndaj partnerit të saj.
Ekspertët e industrisë janë të ndarë mbi deklaratat e Muskut. Disa i konsiderojnë si paralajmërime të arsyeshme, ndërsa të tjerë i cilësojnë si të tepruara. Por një gjë mbetet e qartë: ndikimi i OpenAI në tregun global të inteligjencës artificiale është në rritje të pandalshme.
Ndërkohë, Musk nuk qëndron duarkryq. Kompania e tij, xAI, po përpiqet të ndërtojë një alternativë të fuqishme ndaj OpenAI, me qëllimin për të ofruar një model të AI që është më transparent dhe i pavarur.
Deklarata e fundit e Muskut thellon edhe më tej debatet mbi të ardhmen e inteligjencës artificiale dhe kontrollin mbi teknologjitë që po formësojnë botën e nesërme.
