Deportohet nga Spanja një shqiptar i dënuar për veprimtari terroriste, finalizohet operacioni “Deportimi”
Një shtetas shqiptar i dënuar për veprimtari me qëllime terroriste është deportuar nga Spanja drejt Shqipërisë, si rezultat i një operacioni të koduar “Deportimi”, i finalizuar nga Drejtoria e Antiterrorit në bashkëpunim me Departamentin e Marrëdhënieve Ndërkombëtare të Policisë së Shtetit dhe autoritetet spanjolle.
I deportuari është Kreshnik Haxhiaj, 39 vjeç, i cili ishte në kërkim ndërkombëtar pasi ishte dënuar nga Gjykata e Posaçme për Korrupsionin dhe Krimin e Organizuar në vitin 2024 me 4 vjet e 6 muaj burgim. Ai akuzohet për veprën penale të “Nxitjes, thirrjes publike dhe propagandës për kryerjen e veprave me qëllime terroriste”.
Operacioni u zhvillua në kuadër të bashkëpunimit të ngushtë mes autoriteteve shqiptare dhe spanjolle për identifikimin dhe kthimin e personave të kërkuar për vepra të rënda penale.
Pas mbërritjes së Haxhiajt në Shqipëri, materialet procedurale janë referuar në Prokurorinë e Posaçme Kundër Korrupsionit dhe Krimit të Organizuar (SPAK), e cila pritet të ndërmarrë veprimet e mëtejshme ligjore.
Ky operacion është një tjetër sinjal i bashkëpunimit të frytshëm ndërkombëtar në luftën kundër terrorizmit dhe sjelljes para drejtësisë të personave të dënuar për rrezikshmëri të lartë shoqërore.
