Delegacioni i Prokurorisë Speciale të Kosovës në konferencë rajonale për krimet e luftës në Kroaci

Me ftesë të Kryeprokurorit të Shtetit të Kroacisë, një delegacion i Prokurorisë Speciale të Kosovës, i përbërë nga Kryeprokurori Blerim Isufaj dhe prokurorët e Departamentit për Hetimin e Krimeve të Luftës, Ilir Morina dhe Florije Shamolli, po merr pjesë në Konferencën Rajonale për Krimet e Luftës.

Tema kryesore e konferencës ishte bashkëpunimi ndërkombëtar dhe koordinimi mes vendeve të Ballkanit Perëndimor për hetimin dhe ndjekjen e krimeve të luftës.

Në fjalën e tij, Kryeprokurori Isufaj informoi mbi punën e Prokurorisë Speciale të Kosovës në trajtimin e këtyre rasteve, duke theksuar përkushtimin për hetimin e krimeve dhe nevojën për bashkëpunim ndërkombëtar.

Gjatë vizitës në Kroaci, ai zhvilloi edhe një takim pune me Kryeprokurorin e Kroacisë, Ivan Turudic, ku u diskutuan tema të përbashkëta në fushën e drejtësisë dhe u ra dakord për vazhdimin e bashkëpunimit.

Prokuroria e Shtetit ka njoftuar se edhe pjesëmarrësit e tjerë në këtë konferencë janë pajtuar për domosdoshmërinë e thellimit të bashkëpunimit dhe marrjes së masave për mbrojtjen adekuate të viktimave të shkeljeve të rënda të të drejtave të njeriut.