Berisha në Kongresin e PPE: Shqipëria është “narkoshteti i parë në Europë”, Rama po kontrollon çdo pushtet

Në fjalimin e mbajtur sot në Kongresin e Partive Popullore Europiane (PPE), lideri i Partisë Demokratike të Shqipërisë, Sali Berisha, drejtoi akuza të forta ndaj qeverisë shqiptare dhe kryeministrit Edi Rama, duke e cilësuar Shqipërinë si “narkoshteti i parë dhe i vetëm në Europë”.

Berisha falënderoi drejtuesit e PPE-së për mbështetjen ndaj Partisë Demokratike dhe rezolutën që, sipas tij, “i shërben kauzave të drejta të opozitës shqiptare”. Ai shprehu mirënjohjen për solidaritetin e treguar nga përfaqësues të partive simotra në Gjermani dhe Itali gjatë momenteve të vështira për opozitën shqiptare.

“Shqipëria nën kontrollin e një njeriu të vetëm”

Në një përshkrim alarmues të situatës në vend, Berisha akuzoi kryeministrin Rama për kapjen e të gjitha pushteteve dhe manipulim të sistemit zgjedhor përmes frikësimit dhe blerjes së votave. Ai theksoi se tre liderë të opozitës janë arrestuar padrejtësisht, duke përfshirë edhe Fredi Belerin, për të cilin Berisha tha se u ndëshkua politikisht për refuzimin e një kërkese të familjes Rama.

Lidhje me krimin dhe korrupsion ndërkombëtar

Berisha riktheu në vëmendje edhe çështjen e ish-zyrtarit të FBI-së, Charles McGonigal, duke pretenduar se ai ishte i korruptuar nga qeveria shqiptare për të punuar kundër opozitës. “Shteti dhe krimi janë bërë një sipërmarrje e përbashkët në Shqipëri,” deklaroi ai, duke përmendur përfshirjen e organizatave kriminale ndërkombëtare të lidhura me qeverinë.

Emigracioni dhe kriza demografike

Sipas Berishës, mbi një milion shqiptarë kanë emigruar drejt zonës Shengen nga viti 2014 deri në 2023. Ai tha se vendi po zbrazet dhe përmendi një raport të OKB-së që e rendit Shqipërinë me nivelin më të ulët të lindshmërisë në botë.

Akuza për manipulime në zgjedhje dhe përdorim të kanabisit

Në prag të zgjedhjeve parlamentare të 11 majit, Berisha akuzoi qeverinë për përdorim të mjeteve jo të ligjshme për të siguruar vota, duke përmendur shpërndarjen e 100 eurove për 800 mijë pensionistë dhe dhënien e 100 licencave për kultivimin e kanabisit.

Apel për mbështetje ndërkombëtare

“Me ndihmën tuaj, Partia Demokratike do të përmbysë këtë diktaturë moderne, ashtu siç përmbysi komunizmin 32 vite më parë,” u shpreh Berisha në mbyllje të fjalës së tij, mes duartrokitjeve të të pranishmëve në kongresin e PPE-së.