Berisha akuzon Ramën për grabitjen e pronave në Gjipe dhe Manastirin e Skutarasë: “Nuk do e gëzosh kurrë atdheun”

Kryedemokrati Sali Berisha ka reaguar ashpër ndaj kryeministrit Edi Rama lidhur me grabitjen e pronave në Gjipe, duke akuzuar qeverinë se ka përdorur një agjenci për të vjedhur territore të shtetit shqiptar. Gjatë një takimi në Hiramë për prezantimin e kandidatëve të PD-ASHM në Qarkun e Vlorës, Berisha theksoi se Rama ka vendosur si kolateral të gjithë territorin e Shqipërisë, me në krye Belinda Ballukun, të cilën e akuzoi për vjedhje.

Berisha e akuzoi kryeministrin se po shpërfill pronat e shqiptarëve për interesat personale dhe familjare, ndërsa e shoqëroi këtë me akuza të tjera për abuzim me pasuritë natyrore të vendit. Ai i bëri thirrje Vangjel Tavos, duke e quajtur misionin e tij si një shërbim të pastër për qëllimet mafioze të Ramës, që, sipas Berishës, ka për qëllim plaçkitjen e tokave të Manastirit të Skutarasë dhe të Gjipe.

Në një deklaratë të fortë, Berisha u shpreh: “Toka është e këtyre banorëve, është e manastirit dhe ti nuk do ta marrësh kurrë atë.” Ai theksoi se të gjitha këto akte nuk do të mbeten pa përgjigje dhe premtoi se do të respektohen të drejtat e pronës dhe do të rikthehen ato ku është e mundur.

Duke përfunduar, Berisha tha se qeveria e Ramës është e përfshirë në një abuzim të pashembullt me pasuritë dhe se kjo nuk do të kalojë pa u ndalur.