BE dënon sulmet e Vetëvendosjes ndaj sistemit gjyqësor pas vendimit për arkat fiskale
Ambasadori i Bashkimit Evropian në Kosovë, Aivo Orav, ka reaguar pas kritikave të ashpra të zyrtarëve të Vetëvendosjes ndaj vendimit të Gjykatës Supreme për shfuqizimin e Udhëzimit Administrativ për arkat fiskale.
Orav bëri të ditur se kjo çështje është diskutuar edhe mes shefave të misioneve të BE-së, duke e cilësuar të papranueshme gjuhën e përdorur nga përfaqësues të pushtetit ndaj gjyqtarëve dhe sistemit të drejtësisë.
“Shefat e Misioneve të BE-së diskutuan situatën pas vendimit të Gjykatës Supreme. Sulmet ndaj gjyqtarëve individualë dhe ndërhyrjet politike në sistemin gjyqësor janë të papranueshme,” ka deklaruar ambasadori Orav.
Vendimi i Supremes nuk është pritur mirë nga partia në pushtet, Vetëvendosje, e cila përmes zyrtarëve të saj ka kritikuar publikisht gjyqësorin. Ndaj këtij vendimi kanë reaguar zëvendëskryeministri në detyrë, Besnik Bislimi, ministri në detyrë i Financave, Hekuran Murati, si dhe koordinatorja e komiteteve të VV-së, Dejona Mihali.
Edhe Qeveria në detyrë, e udhëhequr nga Albin Kurti, doli me një reagim zyrtar duke e quajtur vendimin e Supremes të pabazuar dhe si një interpretim të njëanshëm.
BE ka bërë thirrje për respektim të pavarësisë së gjyqësorit dhe për shmangie nga ndërhyrjet politike në çështjet gjyqësore.
