Avokati serb Ivan Niniq: “Jam shpallur agjent shqiptar pasi kërkova përgjegjësi për Banjskën”
Avokati serb, Ivan Niniq, ka deklaruar se prej rreth një muaji është vënë në shënjestër të kërcënimeve dhe fushatës së diskreditimit, pasi në një tubim publik përmendi emrin e Milan Radoiçiqit dhe kërkoi përgjegjësi për ngjarjet e Banjskës.
Sipas tij, që nga ajo ditë është shpallur “agjent shqiptar” nga media të afërta me pushtetin në Beograd dhe faqe të rreme në internet. “Targetimi im dhe kërcënimet nisën pikërisht kur e përmenda emrin e Radoiçiqit. Narrativi i tyre është se unë jam zëdhënës i Albin Kurtit, vetëm pse kërkoj përgjegjësi për atë që ndodhi në Banjskë”, tha Niniq për gazetën “Danas”, transmeton RTK.
Ai ka bërë të ditur se do t’i kërkojë Ministrisë së Brendshme të Serbisë një vlerësim të sigurisë së tij, por jo mbrojtje policore, pasi, siç theksoi, e njëjta polici ka dhunuar studentë dhe ka mbrojtur rastin “Jovanjica”, të cilin e cilësoi si plantazhin më të madhe të marihuanës në Evropë.
“Ky sistem është kriminalizuar dhe polarizuar thellë. Vuçiq qeveris vetëm përmes propagandës dhe represionit. Zgjidhja e vetme janë zgjedhjet e jashtëzakonshme në të gjitha nivelet”, u shpreh Niniq.
