Arrestimi i ish-ushtarit të UÇK-së u publikua nga mediat e Vuçiqit – sot asnjë zë nga Serbia
Ish-ushtari i Ushtrisë Çlirimtare të Kosovës (UÇK), Lulzim Halili, është arrestuar të martën në Serbi. Pamje nga momenti i arrestimit janë publikuar në disa media serbe të afërta me regjimin e Aleksandar Vuçiqit, por autoritetet serbe nuk kanë dalë ende me ndonjë deklaratë zyrtare lidhur me rastin.
Sipas gazetës serbe “Danas”, arrestimi dyshohet të jetë kryer nga Agjencia e Sigurisë dhe Informacionit (BIA), në bashkëpunim me Shërbimin e Hetimit për Krime Lufte të Ministrisë së Brendshme dhe Zyrën e Prokurorit për Krime Lufte.
Mediumi “Novosti”, i njohur për afërsinë me pushtetin serb, ka raportuar se ndaj Halilit është caktuar masa e ndalimit për 48 orë. Sipas të njëjtave burime jozyrtare, ai pritet të paraqitet para prokurorisë kompetente me një kallëzim penal.
Arrestimi i Halilit ka ngjallur shqetësime, ndërkohë që reagimet zyrtare nga institucionet serbe, si dhe nga autoritetet ndërkombëtare apo ato në Kosovë, ende mungojnë.
