Arrestohet 28-vjeçari i përfshirë në dhunën ndaj punonjëses së OSHEE-së në Tiranë

Policia ka vënë në pranga një 28-vjeçar, i cili është përfshirë në ngjarjen e dhunës ndaj punonjëses së OSHEE-së, Rubena Hasa, 38 vjeçe, që ndodhi ditën e djeshme në rrugën “Artan Lenja” në Tiranë. Sipas njoftimit të policisë, 28-vjeçari, i identifikuar si L.M., ndihmoi 30-vjeçarin J.S. (i arrestuar më herët) dhe autorin e ngjarjes, Spartak Cara, i cili është ende në kërkim.

Ngjarja ndodhi kur Hasa shkoi për të kontrolluar sahatin e energjisë në një lokal të zonës, ku u sulmua fizikisht nga Cara. Ajo ka tentuar të shpjegojë arsyen e vizitës, por është goditur rëndë nga autori. Pas dhunës, Hasa u dërgua në Spitalin e Traumës, ku po mbahet nën kujdes mjekësor, ndërsa gjendja e saj është stabile.

Policia ka vazhduar kontrollet intensive për kapjen e Spartak Carës dhe dokumentimin e plotë të ngjarjes. Ajo thekson se hetimet janë në vazhdim dhe do të shqyrtohen të gjitha aspektet ligjore të incidentit.