Ambasadori britanik: Procesi për zbardhjen e fatit të të zhdukurve ka ngecur, duhet veprim i menjëhershëm

Ambasadori i Britanisë së Madhe në Kosovë, Jonathan Hargreaves, ka deklaruar se procesi për zbardhjen e fatit të personave të zhdukur ka vite që ka ngecur dhe se duhet të ketë veprim të menjëhershëm nga institucionet.

Në një konferencë të organizuar nga UNDP dhe Ambasada Britanike me temën “Ndërtimi i Urave: Avancimi i Pajtimit, Dialogut dhe Zërit Qytetas – Çfarë kemi mësuar”, Hargreaves theksoi se mbi 1,500 persona ende figurojnë të zhdukur nga lufta dhe familjet e tyre meritojnë përgjigje.

“Mbi 1500 njerëz janë ende të zhdukur dhe familjet ende po presin për drejtësi, paqen dhe qetësinë e mendjes. Kudo në Kosovë shihet se sa i brishtë është besimi dhe se frika ende i pengon njerëzit të dëshmojnë. Familjet kanë të drejtë të dinë për fatin e më të dashurve të tyre. Si Britani e Madhe mbetemi të përkushtuar për ta ndihmuar Kosovën, sepse kjo nuk ka të bëjë vetëm me të shkuarën, por edhe me të ardhmen”, tha ai.

Ambasadori britanik kujtoi edhe veprimtarinë e Bajram Qerkinajt, i cili për vite me radhë ishte zëri i familjeve të personave të zhdukur. Ai u shpreh se Qerkinaj vdiq pa arritur të marrë informacione për djalin e tij, por mbeti një simbol i forcës dhe i bashkë-dhimbjes.

“Baca Bajram kurrë nuk pushoi së kërkuari djalin e tij të zhdukur dhe u bë zë i të gjitha komuniteteve në Kosovë e më gjerë. Zëri i tij do të na mungojë thellësisht. Të gjithë kemi përgjegjësi të vazhdojmë trashëgiminë e tij, duke inkurajuar institucionet e Kosovës dhe të Serbisë që të punojnë së bashku për të zhbllokuar pengesat për të ditur të vërtetën”, tha Hargreaves.

Edhe Marta Gazideda, menaxhere e programit për qeverisje dhe paqe në UNDP, theksoi rëndësinë e vazhdimit të kërkesës për drejtësi për të zhdukurit.