Ambasadori Britanik Hargreaves takim me Kryetarin e Gjykatës Supreme: Mbështetje e fuqishme për pavarësinë e gjyqësorit në Kosovë
Ambasadori i Mbretërisë së Bashkuar në Kosovë, Jonathan Hargreaves, ka zhvilluar një takim konstruktiv me kryetarin e Gjykatës Supreme të Kosovës, Fejzullah Rexhepi.
Përmes një njoftimi publik, ambasadori britanik bëri të ditur se gjatë këtij takimi është diskutuar gjerësisht për rëndësinë e mbrojtjes së pavarësisë dhe integritetit të sistemit gjyqësor në vend.
“Sot pata një takim konstruktiv me kryetarin e Gjykatës Supreme të Kosovës, ku diskutuam për rëndësinë e mbrojtjes së pavarësisë dhe integritetit të gjyqësorit. Ritheksova mbështetjen e vazhdueshme të Britanisë ndaj institucioneve të drejtësisë në Kosovë dhe përkushtimin tonë të përbashkët për transparencë, profesionalizëm dhe reforma që përforcojnë besimin e publikut në gjyqësor,” deklaroi ambasadori Hargreaves.
Ky takim vjen në një kohë kur institucionet e drejtësisë në Kosovë po përballen me sfida të shumta, përfshirë nevojën për rritje të transparencës dhe forcim të besimit qytetar në sistemin gjyqësor.
Mbretëria e Bashkuar ka qenë një nga përkrahësit e vazhdueshëm të reformave në drejtësi në Kosovë, duke kontribuar në trajnime profesionale, asistencë teknike dhe monitorim të pavarësisë institucionale.
