Agjencia për Informim dhe Privatësi (AIP) ka bërë të ditur se janë evidentuar disa raste mashtrimesh digjitale që po qarkullojnë në rrjete sociale dhe platforma të ndryshme online, ku shpesh shfrytëzohen emrat e personazheve publikë, bizneseve të njohura dhe oferta të rreme kredie.
Sipas AIP, format më të shpeshta të mashtrimeve përfshijnë: përdorimin e imazheve të artistëve për reklama të rreme, ofertat e rreme për kredi në emër të bankave, postime mashtruese që premtojnë kupona dhurate në emër të marketeve si “VivaFresh” dhe “ETC”, si dhe konkurse online që synojnë mbledhjen e të dhënave personale duke përdorur logot e institucioneve dhe kompanive të njohura.
Agjencia apelon tek qytetarët që të jenë të kujdesshëm, të kontrollojnë burimet zyrtare, të verifikojnë çdo ofertë kredie apo dhurate, të mos ndajnë të dhëna personale, të kontrollojnë adresat e faqeve, të mos ndërveprojnë me përmbajtje të dyshimta dhe të raportojnë rastet e mashtrimeve.
“Ne jemi të përkushtuar për mbrojtjen e të dhënave personale të qytetarëve dhe sigurinë e tyre, dhe do të vazhdojmë bashkëpunimin me institucionet për identifikimin e faqeve mashtruese dhe ndërmarrjen e masave ligjore ndaj shkelësve,” thuhet në njoftimin e AIP-së.
Për më shumë informacion, qytetarët mund të kontaktojnë Agjencinë për Informim dhe Privatësi në faqen zyrtare www.aip-rks.org
ose përmes email-it: [email protected]
