Ademi sqaron situatën me Albian Hajdarin: “Do të ishim krenarë ta kishim te Kosova”
Kryetari i Federatës së Futbollit të Kosovës (FFK), Agim Ademi, ka folur për të ardhmen e Albian Hajdarit, përforcimit më të ri të Hoffenheimit, i cili ende është mes Zvicrës dhe Kosovës sa i përket përfaqësimit ndërkombëtar.
Në një intervistë për mediumin zviceran “Blick”, Ademi shprehu dëshirën e madhe për ta parë mbrojtësin e talentuar me fanellën e Kosovës.
“Ne do të ishim të hapur për Albianin. Do të na bënte të lumtur dhe krenarë nëse ai do të na zgjidhte ne. Por, ne e mbështesim çdo vendim që ai e merr. Të gjithë kosovarët – qofshin nga Zvicra apo nga vende të tjera – janë të mirëpritur tek ne. Madje ua japim atyre mundësinë të na provojnë para se të vendosin, pavarësisht nëse luajnë në futbollin e meshkujve apo të grave”, tha kreu i FFK-së.
Ai shtoi se Kosova nuk e ka fokusin vetëm te lojtarët që vijnë nga Zvicra, por edhe nga vende të tjera evropiane.
“Ju thjesht e keni një komunitet të madh kosovar këtu. Por, fokusi ynë nuk është veçanërisht te Zvicra; ne kemi edhe lojtarë nga Gjermania, Franca dhe Skandinavia. Ju (zviceranët) vini re vetëm lojtarët që vijnë nga Zvicra, prandaj keni atë ndjesi (qesh)”, përfundoi Ademi.
