Rihanna konfirmon shtatzëninë e tretë në Met Gala, në stilin e saj unik dhe ikonik
Këngëtarja, sipërmarrësja dhe ikona e modës Rihanna ka zbuluar se është në pritje të fëmijës së saj të tretë, gjatë paraqitjes së shumëpritur në Met Gala 2025 – ngjarja më e madhe e modës në botë që zhvillohet çdo vit në Muzeun Metropolitan të Artit në New York.
E veshur me një fustan elegant të errët dhe një siluetë mbresëlënëse, 37-vjeçarja shkëlqeu në tapetin e kuq, duke prekur barkun e rrumbullakosur dhe buzëqeshur përpara kamerave. Ky ishte konfirmimi zyrtar i shtatzënisë, të cilin Rihanna e bëri si gjithmonë në mënyrën e saj të veçantë dhe plot klas.
Partneri i saj, reperi ASAP Rocky (Rakim Mayers), e shoqëroi në event dhe u shpreh me entuziazëm për lajmin: “Është koha t’u tregojmë njerëzve se çfarë po përgatisnim,” tha ai me humor, duke shtuar: “Jam i lumtur që të gjithë janë të lumtur për ne, sepse ne jemi padyshim të lumtur.”
Çifti tashmë ka dy djem: RZA, i lindur në maj 2022, dhe Riot, i lindur në gusht 2023.
Rihanna është e njohur për mënyrën e veçantë me të cilën ndan momentet e mëdha të jetës së saj. Ajo kishte zbuluar shtatzëninë e parë përmes një seti fotografik në Harlem dhe të dytën gjatë performancës spektakolare në Super Bowl 2023.
Tema e Met Gala këtë vit ishte “Superfine: Tailoring Black Style”, duke vënë në qendër modën mashkullore dhe ndikimin e saj në historinë dhe kulturën moderne. Rihanna ishte ndër të fundit që mbërriti në tapetin e kuq, por si gjithmonë, një nga më të komentuarat e mbrëmjes.
