Eksodi i heshtur: Kur të rinjtë dhe të arsimuarit e braktisin Shqipërinë

Shqipëria po përjeton një eksod të pashembullt që nuk krahasohet më me valët e mëparshme të emigracionit të nxitura nga varfëria. Sot, vendi po zbrazet nga më të arsimuarit dhe më të aftët: mjekë, inxhinierë, studiues dhe zhvillues softuerësh po largohen masivisht drejt vendeve të Bashkimit Evropian, kryesisht Gjermanisë.

Sipas të dhënave më të fundit:

1.2 milionë shqiptarë, ose 44% e popullsisë, jetojnë jashtë vendit.

70% e tyre janë nën moshën 34 vjeç.

47% e emigrantëve të katër viteve të fundit kanë diploma universitare.

Vetëm në Gjermani janë larguar 3,500 mjekë shqiptarë.

91.4% e studentëve shqiptarë planifikojnë të largohen pas diplomimit dhe nuk synojnë kthimin.

Në vetëm pesë vitet e fundit, mbi gjysmë milioni shqiptarë kanë kërkuar azil, leje pune ose qëndrim në BE. Ky nuk është thjesht një fenomen ekonomik, por një braktisje morale: korrupsioni është bërë pjesë e përditshmërisë, meritokracia është mit dhe nepotizmi është rregulli i pashkruar.

Shqipëria renditet mes 10 vendeve me nivelin më të lartë të emigrimit të njerëzve të arsimuar, krah vendeve afrikane të goditura nga krizat e thella. Kjo nuk është më thjesht një ikje — është një zbrazje e vendit nga potenciali, shpresa dhe zëri që mund të kishte sjellë ndryshim.

Ndërkohë, qytetet shqiptare janë kthyer në dhoma miqsh: bijtë dhe bijat e këtij vendi rikthehen vetëm si turistë. Pagëzimet janë të rralla, funeralet të shpeshta. Dhe në këtë realitet të trishtë, mbetet një pyetje që dhemb:
Për kë do të votojnë prindërit shqiptarë?