Besimtarët e krishterë festojnë Pashkët: Mesazhe shprese dhe ringjalljeje nga klerikët fetarë
Besimtarët e krishterë në mbarë vendin kremtojnë sot njërën nga festat më të rëndësishme të kalendarit të krishterë – Pashkët, që simbolizon ringjalljen e Jezus Krishtit.
Në Katedralen Katolike “Shën Pali” dhe në Katedralen Ortodokse “Ngjallja e Krishtit” në Tiranë u mbajtën meshat e shenjta, ku morën pjesë qindra besimtarë për të lutur dhe për të ndarë mesazhin e shpresës dhe besimit.
Në fjalën e tij, Kryepeshkopi i Kishës Ortodokse Autoqefale të Shqipërisë, Imzot Joan, u ndal te domethënia e thellë shpirtërore e kësaj feste. “Në këtë ditë të shenjtë, të gjithë jemi të ftuar të marrim pjesë në këtë gëzim. Kemi sigurinë se dashuria e Tij është më e fortë se urrejtja dhe se shpresa jonë në Krishtin është më e fortë se dëshpërimi,” u shpreh ai.
Duke theksuar nevojën për më shumë solidaritet dhe dashuri njerëzore në kohët e sotme, ai tha se “nëse do të ndizet drita e ngjalljes, edhe marrëdhëniet mes njerëzve do të ndriçohen”.
“Ndoshta sot më shumë se kurrë, bota jonë ka nevojë për mesazhin e Pashkës. Ngjallja e Krishtit na premton një të ardhme të ndryshme. Ai na ka bërë pjesëtarë të ngjalljes së Tij,” theksoi Kryepeshkopi Joan, duke shtuar se sakrifica dhe bekimi janë pjesë e pandashme e rrugëtimit shpirtëror.
Festa e Pashkëve mbetet një moment reflektimi, shprese dhe ripërtëritjeje për të gjithë besimtarët, në një kohë kur bota përballet me sfida të shumta.
