Rusi–Kinë: Dokumente sekrete zbulojnë bashkëpunim për përgatitjen e një pushtimi të mundshëm të Tajvanit

Një dosje prej 800 faqesh me kontrata dhe korrespondencë ushtarake tregon se Rusia po ndihmon Kinën të përgatisë ushtrinë e saj për një pushtim të mundshëm të Tajvanit, raporton Radio Evropa e Lirë, duke cituar Institutin britanik për Shërbime të Bashkuara Mbretërore (RUSI).

Sipas hulumtuesit të lartë të RUSI-t, Oleksandr V. Danylyuk, dokumentet tregojnë se Moska ishte pajtuar që në vitin 2023 t’i shesë Ushtrisë Popullore Çlirimtare të Kinës (PLA) një sërë pajisjesh të avancuara ushtarake, përfshirë makina sulmuese, armë kundërtanke dhe transportues të blinduar ajror të personelit.

Në kontratë, sipas RUSI-t, Rusia jo vetëm do të furnizonte pajisjet, por do të trajnonte një batalion elitar të parashutistëve kinezë dhe do t’i transferonte teknologji ushtarake Pekinit, duke i lejuar kështu që Kina të prodhojë armë të ngjashme brenda territorit të saj.

Këto pajisje, sipas ekspertëve, do të forconin aftësitë e zbarkimit ajror të Kinës, një prej fushave ku Rusia ruan avantazh, dhe do të mundësonin që forcat speciale kineze të hynin në Tajvan nga ajri pa u detektuar, duke krijuar kushte për një pushtim detar të mëvonshëm.

“Ideja është që këto forca speciale të mund të zbarkojnë në territorin tajvanez nga avionë civilë, nga lartësi të mëdha, pa u vërejtur. Me këto pajisje, Kina do të mund të siguronte kontrollin e porteve strategjike, si ai i Tajpeit,” – tha Danylyuk për Radion Evropa e Lirë.

Sipas tij, Rusia po e sheh bashkëpunimin me Kinën si pjesë të një “boshti të shteteve problematike”, që përfshin Pekinin, Moskën, Teheranin dhe Phenianin, dhe e konsideron Indo-Paqësorin si zonën më të përshtatshme për përshkallëzim global.

“Rusët duan që Kina ta pushtojë Tajvanin, dhe që lufta të mos mbarojë shpejt, por të zgjasë, sepse kjo do të krijonte mundësi për përfshirje të SHBA-së dhe aleatëve të saj,” shtoi Danylyuk.

RUSI paralajmëron se, përveç furnizimeve ushtarake, Moskës mund t’i interesojë të ndikojë edhe në destabilizimin e brendshëm politik të Tajvanit, përmes përçarjeve në parlament dhe protestave që po tronditin vendin.

Ekspertët besojnë se Rusia po transferon edhe përvojën e saj nga lufta në Ukrainë, përfshirë taktikat me raketa dhe dronë, që mund të përdoren për të shtypur mbrojtjen ajrore tajvaneze në një skenar pushtimi.

Megjithatë, Danylyuk thekson se rezistenca e Tajvanit nuk do të varet vetëm nga pajisjet ushtarake, por nga uniteti dhe morali i shoqërisë tajvaneze, si dhe nga mbështetja e qartë e Shteteve të Bashkuara.

“Imunizimi i vërtetë kundër një pushtimi qëndron te uniteti, morali dhe vendosmëria për të luftuar. Pushtimi do të ishte jashtëzakonisht i kushtueshëm për Kinën,” – tha ai.

Instituti RUSI nënvizon se dokumentet “duken autentike” dhe janë verifikuar në mënyrë të pavarur, por lë të hapur mundësinë që disa pjesë të tyre të jenë ndryshuar apo hequr.

Moska deri më tani nuk ka komentuar për zbulimet.