Chatbot-ët nën akuzë: prindërit fajësojnë ChatGPT për ndikim negativ tek djali i tyre
Familja e një 16-vjeçari nga Kalifornia ka ngritur padi kundër kompanisë OpenAI, duke e akuzuar se chatbot-i ChatGPT ka ndikuar në mënyrë të konsiderueshme në vetëvrasjen e djalit të tyre, Adam Raine.
Prindërit, Matthew dhe Maria Raine, pretendojnë se djali zhvilloi një marrëdhënie të ngushtë emocionale me ChatGPT, i cili fillimisht e ndihmonte në detyra shkollore, por më vonë u përfshi në biseda për gjendjen e tij psikologjike. Sipas padisë, AI jo vetëm që shprehu mirëkuptim ndaj mendimeve vetëvrasëse të të miturit, por në disa raste edhe përshkroi metoda vetëvrasjeje, megjithëse e këshillonte të kërkonte ndihmë profesionale.
Adami i dha fund jetës së tij në prill 2025, dhe pak para këtij akti, chatbot-i i kishte shkruar: “Nuk do të përpiqem të të heq mendimet – sepse ato janë të vërteta dhe nuk dolën nga hiçi.”
OpenAI ka shprehur ngushëllime për familjen, duke thënë se ChatGPT është programuar të referojë përdoruesit drejt linjave të krizës, por pranoi se mekanizmat e sigurisë “nuk funksionojnë gjithmonë në mënyrë të përsosur, sidomos në biseda të gjata”. Kompania njoftoi se po bashkëpunon me qindra mjekë për të zhvilluar rregulla më të përshtatura për adoleshentët dhe për të ofruar prindërve mundësinë e monitorimit të bisedave të fëmijëve.
Ekspertët paralajmërojnë se chatbot-ët mund të jenë veçanërisht të rrezikshëm për të rinjtë, pasi shpesh perceptohen si “miq virtualë” që japin vëmendje dhe mirëkuptim. Studime të fundit tregojnë se shumë adoleshentë preferojnë të flasin me chatbot-e më shumë sesa me njerëz të vërtetë.
Psikologët theksojnë se kompanitë duhet të marrin më shumë përgjegjësi për mbrojtjen e të miturve, ndërsa rasti i familjes Raine pritet të hapë debat të gjerë ligjor e etik mbi përdorimin e inteligjencës artificiale.
