BE miraton deklaratë të përbashkët pro-Ukrainës, Hungaria refuzon nënshkrimin
Udhëheqësit e Bashkimit Evropian kanë miratuar një deklaratë të përbashkët përpara samitit SHBA–Rusi të premten, duke riafirmuar mbështetjen e palëkundur për Ukrainën. Dokumenti, i hartuar nga presidenti i Këshillit të BE-së, António Costa, u nënshkrua nga të gjitha shtetet anëtare, përveç Hungarisë, e cila refuzoi të bashkohej.
Deklarata mirëpret përpjekjet e presidentit amerikan, Donald Trump, për t’i dhënë fund luftës së agresionit të Rusisë dhe për të arritur një paqe të drejtë e të qëndrueshme për Ukrainën. Ajo thekson rëndësinë e respektimit të ligjit ndërkombëtar dhe integritetit territorial të vendit, duke deklaruar se “kufijtë ndërkombëtarë nuk duhet të ndryshohen me forcë”.
Liderët e BE-së kërkuan që Ukraina të jetë pjesë e çdo procesi paqeje dhe paralajmëruan se çdo zgjidhje diplomatike duhet të mbrojë interesat jetike të sigurisë së saj dhe të Evropës. Po ashtu, ata konfirmuan gatishmërinë për të ofruar mbështetje të mëtejshme politike, financiare dhe ushtarake për vetëmbrojtjen e Kievit, si dhe për rrugën e tij drejt anëtarësimit në BE.
Hungaria, nën qeverisjen e Viktor Orbán, ka kundërshtuar vazhdimisht deklarata të ngjashme që parashikojnë ndihmë ushtarake ose financiare për Ukrainën dhe ka bërë fushatë kundër anëtarësimit të saj në BE, duke e cilësuar si një kërcënim ekonomik e të sigurisë. Sipas një sondazhi jo-detyrues “Voks2025” të zhvilluar nga qeveria hungareze, 95% e mbi 2 milionë të anketuarve janë shprehur kundër pranimit të Ukrainës në BE.
