2 milionë euro për punësimin e komuniteteve joshumicë në gjithë Kosovën

Qeveria në detyrë e Kosovës ka ndarë 2 milionë euro për të mbështetur punësimin e qytetarëve nga komunitetet joshumicë në gjithë territorin e vendit.

Mjetet do të sigurohen nga Pakoja e Ringjalljes Ekonomike dhe do të transferohen te Ministria për Komunitete dhe Kthim, e cila ka kërkuar këtë financim për të zbatuar masën 1.9, që synon rritjen e punësimit në mesin e komuniteteve joshumicë.

Kryeministri në detyrë, Albin Kurti, theksoi se kjo ndihmë është vazhdimësi e përkushtimit të Qeverisë për integrim dhe mirëqenie të barabartë. “Kemi lansuar masën e punësimit, duke subvencionuar deri në 2000 vende pune në sektorin privat për qytetarët që jetojnë në katër komunat veriore. Ndërsa sot po miratojmë ndarjen shtesë prej 2 milionë euro për të mbështetur qytetarët e komuniteteve joshumicë në mbarë vendin,” deklaroi Kurti.

Ndërkohë, ministri në detyrë i Financave, Hekuran Murati, tha se Ministria për Komunitete dhe Kthim ka paraqitur një plan të detajuar për masat që do të ndërmerren me këtë buxhet shtesë. “Qëllimi është rritja e punësimit dhe zhvillimit ekonomik në mënyrë të barabartë për të gjithë qytetarët, pavarësisht përkatësisë së tyre etnike,” tha Murati.