Emilija Rexhepi takohet me Presidenten Osmani – në fokus konstituimi i Kuvendit

Deputetja boshnjake dhe kryetarja e partisë Nova Demokratska Stranka, Emilija Rexhepi, është takuar sot me Presidenten e Republikës së Kosovës, Vjosa Osmani, në kuadër të konsultimeve për konstituimin e Kuvendit të ri.

Përpara saj, në Presidencë ka qëndruar edhe deputetja tjetër boshnjake dhe kryetarja e partisë Socijaldemokratska Unija, Duda Balje.

Presidentja Osmani ka filluar një cikël takimesh me liderët e partive politike të përfaqësuara në Kuvend, me qëllim të gjetjes së një rruge të përbashkët për formimin e institucioneve të reja. Të mërkurën, ajo ka zhvilluar takime me drejtuesit e partive më të mëdha, ndërsa sot po vazhdon me përfaqësuesit e partive më të vogla dhe nga komunitetet.

Në një komunikatë për media, Zyra e Presidentes bëri të ditur se Osmani ka theksuar nevojën që, “në frymën e bashkëpunimit dhe mirëbesimit, si dhe në dobi të interesit qytetar dhe shtetëror,” të gjendet një pajtim për konstituimin e Kuvendit brenda afatit 30-ditor të përcaktuar nga Gjykata Kushtetuese.

Takimet pritet të vazhdojnë edhe me përfaqësues të tjerë politikë gjatë ditës.