21 Shtatori 2014: Kur Papa Françesku përqafoi shpirtin e popullit shqiptar

Sot përkujtohet një moment historik për Shqipërinë dhe popullin e saj: vizita e Papa Françeskut më 21 shtator 2014, një ngjarje që mbetet e pashlyeshme në kujtesën kombëtare. Ati i Shenjtë vizitoi vendin tonë për të përqafuar një popull të sprovuar nga dekadat e diktaturës komuniste, për të dhënë mesazhe paqeje, bashkëjetese fetare dhe shprese për të ardhmen.

Papa Bergoglio, i ndjekur me entuziazëm dhe dashuri të jashtëzakonshme nga të rinjtë shqiptarë, e nisi vizitën që nga aeroporti e deri te Presidenca, Katedralja e Shën Palit dhe Qendra Betania. Ai u mahnit nga mikpritja dhe forca shpirtërore e një populli që kishte mbijetuar persekutimin ateisto-komunist.

Në fjalimin e tij të parë zyrtar në pallatin presidencial, Papa theksoi: “Askush të mos e përdorë Zotin si mburojë për të kryer akte dhune. Askush të mos e përdorë fenë për vepra kundër dinjitetit të njeriut dhe të drejtave të tij.” Ai theksoi rëndësinë e bashkëjetesës dhe dialogut ndërfetar, duke e vlerësuar Shqipërinë si një shembull për botën.

Gjatë takimit me krerët fetarë, Papa Françesku theksoi: “Të vrasësh në emër të Zotit është sakrilegj i madh!” dhe shtoi se “sa më shumë të jemi në shërbim të të tjerëve, aq më shumë jemi të lirë!”

Ai u bëri thirrje të rinjve shqiptarë që të mos largohen, por të punojnë për atdheun e tyre, sepse siç tha ai, Shqipëria ka nevojë për të rinjtë për të ecur përpara drejt rrugës së demokracisë dhe zhvillimit.

Vizita e Papa Françeskut erdhi 21 vite pas asaj të Papës Gjon Pali II më 25 prill 1993, i cili rivendosi hierarkinë e Kishës katolike në Shqipëri pas viteve të errëta të shtypjes fetare.

Një ditë që shënoi ringjalljen shpirtërore të një populli dhe dha mesazhe që vazhdojnë të frymëzojnë edhe sot.