15 vjet nga vendimi i GJND-së: Akademik Bajrami kritikon diplomacinë kosovare për mosshfrytëzim të fitore së madhe juridike

Sot shënohen 15 vjet që nga vendimi historik i Gjykatës Ndërkombëtare të Drejtësisë (GJND) në Hagë, e cila më 22 korrik 2010 konfirmoi se shpallja e Pavarësisë së Kosovës nuk përbënte shkelje të së drejtës ndërkombëtare. Ky vendim u cilësua si një fitore e madhe për shtetësinë e Kosovës, por sipas akademikut Arsim Bajrami, ai nuk u shfrytëzua si duhet nga diplomacia vendore.

“Ky vendim ka qenë një fitore e madhe juridike e Kosovës. Pas këtij vendimi, është dashur që Kombet e Bashkuara në mënyrë universale ta pranojnë këtë qëndrim të GJND-së. Për shkak se gjykata konfirmoi se shpallja e pavarësisë nuk bie ndesh me asnjë akt ndërkombëtar, çështja e statusit të Kosovës është dashur të konsiderohej e përfunduar,” tha Bajrami për Radio Kosovën.

Megjithatë, përkundër rëndësisë së këtij vendimi, Bajrami thotë se përparimi i Kosovës në arenën ndërkombëtare u pengua nga vetoja e Rusisë dhe Kinës në Këshillin e Sigurimit të OKB-së. Si pasojë, në vitin 2011 nisi dialogu teknik Kosovë–Serbi, që sipas tij, vetëm sa ka zgjatur paqartësinë mbi statusin ndërkombëtar të Kosovës.

“Ky dialog nuk i ka dhënë fund konfliktit me Serbinë, përkundrazi, po e mban akoma pezull Kosovën”, shtoi ai.

Akademiku theksoi se diplomacia kosovare nuk u tregua aktive për të kapitalizuar këtë fitore ligjore në planin ndërkombëtar.

“Diplomacia kosovare nuk ka zhvilluar një ofensivë të fuqishme diplomatike për të bindur shtetet mosnjohëse që ta njohin shtetin e Kosovës. Një fitore e tillë, si ajo e GJND-së, do të ishte përdorur nga çdo shtet për afirmim ndërkombëtar”, deklaroi Bajrami.

Gjykata Ndërkombëtare e Drejtësisë u thirr nga Kombet e Bashkuara për të dhënë opinion këshillëdhënës mbi ligjshmërinë e shpalljes së Pavarësisë së Kosovës, pas ankesave të Serbisë. Vendimi i saj përfundimtar hodhi poshtë pretendimet serbe, duke konfirmuar legjitimitetin ndërkombëtar të pavarësisë së shpallur më 17 shkurt 2008.