Tensione të forta në seancën gjyqësore të “Plumbi i Artë”: Avokati braktis sallën dhe akuzon të penduarin Nuredin Dumanin për kërcënim
Seanca gjyqësore për dosjen e njohur “Plumbi i Artë” ka pasur një zhvillim të papritur këtë të mërkurë, pas një incidenti të rëndë në sallë. Avokati Ilirian Dyzeni, mbrojtës i të pandehurit Besian Xhixha, ka braktisur seancën, duke akuzuar dëshmitarin e penduar Nuredin Dumanin për kërcënim.
Në mes të zhvillimeve në sallën e gjyqit, Dyzeni është ngritur dhe ka shpallur akuzat e tij, duke thënë: “Nuk toleroj mua të më kërcënojë dikush në sallë dhe prokurori të mos reagojë. Nuk mund të më bëjë ai presion mua. Nuk dëgjoj unë atë të më thotë ‘të fus në listë, je në ofertë’.” Pas këtyre deklaratave, avokati ka lënë menjëherë sallën e gjyqit.
Ky incident ka shkaktuar një kaos të përkohshëm në gjykatë, me gjykatën që urdhëroi punonjësit e policisë të largonin Dumanin nga salla, ndërsa seanca është ndërprerë për disa minuta për të qetësuar situatën.
Dyzeni ka kërkuar ndërhyrjen e prokurorit dhe marrëjen e masave ndaj Dumanit, i cili është një nga dëshmitarët kyç të procesit dhe ka dhënë dëshmi për disa grupe kriminale në vend. Sipas avokatit, ky kërcënim mund të ndikojë në integritetin e procesit gjyqësor dhe është i papranueshëm në një gjykatë të drejtë.
